اليوم السادس من اكتوبر عام 2007.. اول ما يتبادر الى ذهنك هو ذكرى 6 اكتوبر عام 73 ولكن قد حدث اليوم امر جلل..احتجاب 22 صحيفة مصرية عن الصدور احتجاجا على احكام بحبس الصحفيين
الساعة الثالثة والنصف عصرا وانا اخرج الان لكشك الجرائد المجاور مع العلم بان اعصابى لا تتحمل قراءة الجرائد الصفرا -الاهرام والخبار والجمهورية واخواتهم-
سلامو عليكم
عليكم السلام
عايز المصرى اليوم لو سمحت
لا ده منزلش النهارده.. لا هو ولا كل الجرايد المعارضة
رسمت علامات الاندهاش على وجهى ليه
محتجين علشان حبس الصحفيين فى القضية بتاعة ابراهيم عيسى
طب انت فاتح ليه طيب؟؟ هو لسه فى حد بيشترى الاهرام؟؟
تقريبا مفهمش قصدى فقال لا الاهرام خلص انا عندى المسائى
سددت اليه نظرة ارض ارض
وعندى كمان روزاليوسف
دى تبع الحكومة يا عم
لا دى مش تبع الحكومة.. هى كويسة بس عيبها انها علمانية وبتشتم فى قناة الناس والرسالة,, وقال ايه قنوات الاغانى ودريم هى اللى حلوة
عند ذلك لاحظت انه سايب دقن خفيفة اوى.. كنت فاكر فى الاول انه عادى مش حالقها زى ما بعمل احيانا
فكرت بينى وبين نفسى فى شرائها لمجرد الفضول لمعرفة ماذا ستكتب حول احتجاب الصحف الاخرى يعنى اشتريها على ضمانتك ولا دى اى كلام
لا كويسة بس زى ما قولتلك دى علمانية وشيعية
فقعته كمان نظرة ارض جو ايه ده؟؟علمانية وشيعية مع بعض؟؟
ايوا
بكام طيب
بجنيه
فى تلك الاثناء جاء احد اصدقائى لشراء الجرايد.. لا اتذكر كيف عاد الحوار مرة اخرى لحبسش الصحفيين
بس حسنى فعلا كان تعبان..كان ممكن بكل بساطة يطلع من الاول فالتلفزيون يبقى الموضوع انتهى ,,انما يسكتوا شوية وبعدين سوزان ىتطلع تكذب وسرور يطلع يكذب وفى الاخر يطلعوا لقطات ارشيفية ان صحته بمب وبيجرى فى الشوارع
هو احنا كده لازم نستنى الراجل ده لما يموت علشان حد يجى يمسك بداله.. احنا هنفضل دول متخلفة على طول.. عارف ان اسرائيل بنفق ربع ميزانيتها على الابحاث العلمية والدول العربية مش بتصرف حتى واحد فى المية مع انها دول غنية.. علشان كده دول متخلفة
تدخل فى الحوار راجل فى الخمسينات كان لتوه قد اشترى المسائى طول ما الشعب عندنا مش مؤمن ربنا هيسلط عليه حكام بيعصوا ربنا.. ودلل على كلامه بحديث قدسى يؤدى الى هذا المعنى.. هو العيب فينا ولازم كل واحد يصلح نفسه الاول ونخاف ربنا
ايوا العيب فينا.. يعنى المال السايب يعلم السرقة.. هو احنا نسيب فلوسنا فى الشارع وبعدين نستغرب ان الناس بتسرقها.. نوطى ونستغرب انهم بيركبونا
تعرف ان اسرائيل متقدمة فى كل حاجة حتى الكورة.. ده لدرجة انهم بيلعبوا فى الدورى الاوروبى,, يلعبوا مثلا مع انجلترا ويخسروا اتنين صفر بس... او مع اسبانيا ويتعادلوا
طب وليه وهما مش فى اوروبا
اصل الدول الافريقية والاسيوية مش راضية تلعب معاها علشان هى دوله عنصرية
انتهزت فرصة قدوم حوالى اربعة دفعة واحدة لشراء الجرايد
ماشى يا جميل انا عارف انى صدعتك
لا عادى ولا يهمك
سلامو عليكم
عليكم السلام
انا بكلم نفسى: حلوة مش راضيين يلعبوا معاها دى,, ولا شيعية وعلمانية
اه نسيت اقول انى اشتريت عين و روزاليوسف.. بس الصراحة مش هقدر اقولك على اللى قريته.. اعصابى متستحملش
Subscribe to:
Post Comments (Atom)
No comments:
Post a Comment