Thursday, September 20, 2007
مستغرب ليه؟؟
فى يوم من الايام العادية جدا كنت راكب ميكوباص, عادى زى كل الناس, لكن اللى مش عادى ان الميكروباص عطل بينا فى السكة.. مش مهم فين بس المهم ان كان فى ظابط والدنيا كانت زحمة وبصراحة الميكروباص عمل قلق والسواق وقع فى حيص بيص والظابط عمال يشاورله انه يطلع, وده يدور فى العربية مش بتدور... حس انه فى ورطة ولازم يتصرف بسرعة.. هوووووووووب نزل من العربية وقال ايه بيزق.. بيزق وفى العربية تلاتاشر راجل بشنبات,, الصراحة انا ارتبكت وبصيت حواليا..الناس متنحاااااااااااا وملامح وشهم باردااااا.. "ماتيجى ننزل نزق معاه" انا قولت للى جنبى, بصلى كده من فوق لتحت " يا عم خليك قاعد" قولتله " طب على الاقل ننزل ومنزقش" المهم برضو متحركش من مكانه وهو كان قاعد بينى وبين الباب.. قبل ما افكر لقيت شوية ناس جم يساعدوا السواق ويزقزا معاه العشرة طن دول وسبحان الله من غير ما حد يعلق على ان العربية كومبليت... العربية اتحركت وحسيت باحساس غريب وبعدنا عن الاشارة والظابط,, وشوية وخدت سرعة واحساسى ده زاد, وزادت السرعة اكتر واحساسى زاد اكتر,, لحد ما دارت بس الصراحة, انا مكنتش عايزها تدور.. بصيت للناس الى زقوا العربية وهما ماشيين بينهجوا, وبصيت للراجل اللى جنبى وعلى وشه بسمة الانتصار, دلوقتى بس انا عرفت الناس دى منزلتش ليه
Subscribe to:
Post Comments (Atom)
2 comments:
بكل بساطه الناس بقت نفوسها مش صافيه و ما بتصدق تفرح بأى إنتصار رخيص
بجد مش عارف هو احنا نستاهل كل اللى بيحصل فينا ولا احنا مظلوميين... تلاقى الناس فى كل حتة تقعد تشتم فى الشعب زى مثلا ان احنا لازم نمشى بالعصاية ونتحكم بالحديد والنار او يشتموا فى كل الناس على اساس انهم اخلاقهم بقت وحشة وانحدرت قيمهم
والعجيب ان كل واحد بيبرا نفسة ويرمى اللوم على بقيت الناس.. بجد بجد نفسى اقابل حد يعترف بانه جزء من الناس والشعب اللى بيتحمل مسئولية كل حاجة بتحصل
Post a Comment