ان تستيقظ فجاة..وتجد الدنيا اتشقلب حالها ..يااااااااااه,, من زمان قوى مجيتش الدنيا. سبحانه مغير الاحوال... ان ترى شريط حياتك وذكرياتك الذى يتجاوز العشرين عاما يمر امام عينيك فى لحظات... شعور بالقوة, او شعور بالضآلة - ازاى؟ معرفش- بس هو شعور غريب وخلاص.. انك عملت حاجات كتير قوى وفى الاخر كانها ولا حاجة
تمشى فى الشوارع و تنظر للناس نظرات غريبة كانك اول مرة تشوف بنى ادمين.. كائن فضائى متنكر فى شكل انسان.. تقولشى بيدرس البنى ادمين, ومستغرب من سلوكهم تصرفاتهم كلامهم كل حاجة
كنت زمان اخدت موقف من الدنيا انى اعيش على مزاجى,, طبعا كل واحد حر.. ولميت هدومى وكتبى وشيلت البيت على البساط السحرى وروحت عالم تانى..عالم انا اللى خلقته على مزاجى..اهم حاجة فيه انه مفيهوش ساعة, ومفيهوش عقارب بتلف,ولا عقارب بتقرص.. ومفيهوش كائنات مقززة زى البنى ادمين.. وكمان مفيهوش صوت يزعجك عالم من الصمت,, بس كله صور والوان.. الوانه اجمل من عصافير الكناريا والشعاب المرجانية والسمك فى البحر الحمر..عالم من غير ليل ونهار .. نور الشمس جميل بس الشمس نفسها مش موجوده.. وسحابة خفيفة .. وهوا بارد منعش
وفجاة قررت انى ازور الدنيا تانى..اصلها وحشتنى.. وحشتنى البنى ادمين المقززة..وحشتنى الدوشة والخناق والصريخ.. وحشتنى السفالة وقلة الادب..وحشنى القرف والملل..
مشيت فى الشوارع ابص على الناس اللى عايشة شكلهم فعلا يفطس من الضحك.. حبيت اعيش المود ,, بصيت فى الساعة يمكن اكون متاخر,, بس متاخر على ايه؟؟ انا عايز ابقى مش فاضى,, وعايز اكشر واصدر الوش الخشب,, عايز امشى بسرعة ومبصش ورا كانى بجرى من حد.... بس مش عارف
الناس زى ما تكون ماشية فى طابور كلهم مكشرين ومش فاضيين وقرفانيين,,اللى عايز يلحق الشغل, واللى عايز يلحق يحيب الخضار احسن مراته تطرده من البيت, واللى عايز يلحق ميعاد المزة.. كل لما اجى اخش فى الطابور من سرعتهم يخبطونى واقع على الارض.. غريبة .. كلهم ماشيين كانهم مش شايفنى اساسا..بس انا عايز اعيش معاهم,, زهقت خلاص من العالم بتاعى,,
ايه ده؟؟؟ فى ناس واقفين لوحدهم مش فى الطابور.. جريت عليهم,, كابتن كابتن.. ممكن اعيش معاكو؟؟؟ بصلى كده من فوق لتحت.. روح موت بعيد عنى
Subscribe to:
Post Comments (Atom)
1 comment:
I got it!..so you mean that if somebody is not doing anything he is just dead, you mean that you must do something with your life..that was a very nice story..keep it up
el masry affendi
Post a Comment