كلنا فى الهوا سوا

تابعت بشغف حملة كلنا ليلى وطبعا مستعربتش من الكلام لان بصراحة مفبش جديد -ومش عايز واحدة fiminist خنيقة تقولى: احنا مش بنطالب بحاجة جديدة. احنا عايزين ننفذ الكلام اللى بنقوله بقالنا ميت سنة- بس انا من وجهة نظرى المتواضعة شايف انكوا عارضين جزء من المشكلة وفى رائيى المتواضع برضو مش حتوصلوا لحل... لازم نرجع بضهرنا لورا شوية وكمان شوية علشان نشوف الصورة كلها علشان حكمنا على الامور يبقى صح.. مش فاهم؟؟ اشرحلك

هل المشكلة تتلخص فى ان الرجالة مفتريين وبيستقووا على الستات الغلابة؟ ولا الموضوع توم وجيرى الاعداء الطبيعيين اللى ربنا خلقهم كده؟؟ الموضوع مش كده خالص.. المشكلة مشكلة مجتمع بحاله, مجتمع بيمارس العنف والتمييز والتحجيم والعزل ضد الفئات الضعيفة كلها بلا استثناء.. رجعت لورا وشوفت الصورة كلها.. طب ركز معايا كده

مش المجتمع بيمارس نوع من التمييز ضد الفقراء والمهمشين,, مش قصدى سياسة الدولة, فى الثقافة العامة واسلوب تفكير الناس وطريقة حياتهم.. عندهم طالما انت غنى يبقى انت انسان محترم والفقرا دول ولاد كلب.. معيار الحكم على البنى ادم البدلة اللى هو لابسها والعربية اللى راكبها وهو ساكن فين ومتجوز بنت مين.. متقولش لا مش كل الناس كده لان كل الناس كده, ده حتى الفقرا بيفكروا بنفس الاسلوب وبيستعروا من نفسهم.. مثلا كلنا بنحب بواب العمارة الغلبان اللى جاى من الصعيد وبنديله الهدوم القديمة بس ممكن تصاحب ابنه؟؟؟؟ سؤال صعب مش كده.. ايه يعنى هو فى مدارس عربى وانت لغات ده اذا كنت لغات ولا علشان هو بيلبس هدومك القديمة؟؟طب مثل تانى شوف اى حد عنده سواق بيعامله ازاى.. فى نظرة سواق يعنى مرمطون مع انه واحد كل شغلته انه يسوق وبس يوصلك انت والمدام ويجيب الولاد من المدرسة شغله العربيه وبس, انما فى الواقع هو مرمطون... طب ليه احنا بنسغرب لما نشوف عربية جامدة فى حتة شعبية-يعنى حتة بيئة وزبالة ووسخة- طب ليه الاغنيا بيطبقوا سياسة عزل اختيارية ويكسنوا فى الجيتو فى الساحل الشمالى ولا التجمع الخامس ولا 6 اكتوبر... وفى الاخر بيسرقوا من ال200 ولا ال300 جنية اللى الرجل الغلبان بياخدهم كل شهر, يبقى ده تمييز ولا مش تمييز

والمجتمع برضو بيمارس تمييز ضد الاطفال بدعوى انهم صغيرين وقاصرين او قصر ومش بيفهموا... تلاقى الواحدة من دول رامية ابنها يعيط بالساعات طالما رضعته وغيرتله , عملت اللى عليها بقى.. وده عن جهل.. عمرك شوفت حد قرا كتاب عن تربية الطفل قبل ما يخلف او مراحل نمو الطفل واحتياجات كل مرحلة وبالذات النمو النفسى..والمثل الصارخ اللى حديهولك اننا مازلنا بنعتمد على الضرب وسيلة اساسية للتعليم والتربية, الاب والام بيضربوا العيل فى البيت والمدرس يضربوا فى الدرسة ونربى اجيال من المعقدين نفسيا, فمش غريبة لما نلاقى اطفال بيهربوا من بيوتهم ولا اهل رموا ولادهم ويبقوا اطفال شوارع -اللى بيشحتوا مننا فى كل حتة دول- ولما يكبروا يبقوا مجرمين

طب مش العسكريين -جيش وشرطة- بيمارسوا تمييز واضطهاد ضد المدنيين؟؟؟؟ طبعا مش محتاج اشرحلكوا

طب مش احنا بنمارس تميييز ضد المسيحيين -انا بتكلم بهدوء محدش يضرب- يعنى مثلا ليه نعملهم فيلم كل اما يبنوا كنيسة؟؟ حتقولى دى سياسة نظام الحكم واحنا معارضة؟ طب بلاش خلينا فى الناس.. تعرف كام واحد مسيحى ومسلم مانتمين مع بعض طب كام اسرة مسلة ومسيحية بينهم علاقات اجتماعية واصحاب؟؟ المسيحيين دلوقتى عايشيين فى عالم لوحدهم بمزاجهم وفى نفس الوقت غصب عنهم, تلاقى شلة كلها ch مفيهاش ولا مسلم, وبيسكنوا جنب بعض , وعلاقاتهم الاجتماعية مع المسلمين مقطوعة.... وعلى فكرة هما لما بيبقوا الاغلبية برضو بيمارسوا تمييز يعنى مفيش مسلم يدخل الشلة لو واحد عنده محل ولا شركة الاولوية فى الشغل للمسيحى طبعا وميشغلش مسلم الا لو مضطر وحاجة مهمة جدا جدا جدا وحدش اتكلم فيها قبل كده ان الفلوس اللى بتدخلهم بتدور فى دورة مسيحية مغلقة,, يعنى يروح يتعالج عند دكتور مسيحى وياخد درس عند مدرس مسيحى ويشترى من محل صاحبه مسيحى حتى لو بعيد ومش حلو اوى... ولو نزلت للطبقات اللى تحت تلاقيهم فاهمين اننا بندخل الجامع ندبرلهم مؤامرات والمسلمين برضو فاهميين انهم بيدخلوا الكنيسة يدبروا مؤامرات..المشكلة مش فى المسلمين ولا المسيحيين المشكله الصراحة فى الاتنين, مش فى دينهم , فى الثقافة المنتشرة بينهم

يعنى كده تمييز حسب النوع والسن والوظيفة والدين والمستوى الاجتماعى والمادى عايز ايه تانى؟؟ يبقى الحل مش ان المراة تنفرد بدور الضحية وكان التمييز ضدها لوحدها لانها مش حتعرف تعالجه كده لانها ثقافة وفلسفة فى الحياة..انا مش عايز المجتمع يدى للمراة حقوقها, انا عايز المجتمع يحترم الضعيف .. الحل انك تغير دماغ المجتمع