اخذت نفسا عميقا وضممت قبضتى لااراديا واسرعت الخطا وانا فى طريقى الى اللجنة,, لجنة الانتخابات ,, هذه اللجنة الحساسة فى هذا الجزء الحساس من البلد.. انها الباجور عاصمة كمال الشاذلى.. اللجنة اللى بتتقفل 99% زى انتخابات الرئاسة بالضبط..
اخدت اتخيل ما يمكن ان يكون عليه حال اللجنة,, عساكر امن مركزى كتييييير,, وزحمة وبشر وخنقة,, ااااااااه واكيد فى ضرب طحن,, علشان كده كنت مستعد نفسيا انى انفض الكلية اسبوع نقاهة,,مع ان الاستفتاء اللى فات مكانش فى ضرب عندنا ولا انتخابات مجلس الشعب.... غريبة
من بعيد سمعت صوت ميكروفون مش مميز ,,شوية شوية بدات اسمع "نعم للمواطنة, المواطنون متساوون فى الحقوق والواجبات وشركاء فى بناء هذا الوطن, صوتك امانة, شارك فى تعديل الدستور" قربت اكتر لدرجة جعلتنى ارى المتحدث,, شكله راجل غلبان طلعان عين امه من الفقر,, قاعد على موتوسيكل "سنكار" كما يسميه الناس عندنا- واصلها فى اللغة side car-المهم توكلت على الله ودخلت اللجنة
اول حاجة لفتت انتباهى انى مشوفتش ولا عسكرى لحد دلوقتى اللهم الا راجل عجوز ماسك طبنجة وقاعد على باب المدرسة,, والاغرب من كده مفيش زحمة خالص.. اكيد فى حاجة غلط.. هما شوية ناس صغيرين نصهم لابسيين بدل.. روحت سالت واحد هى اللجان فين فشاورلى على شوية فصول قدام الحوش
لحد دلوقتى وكل حاجة طبيعية يعنى مفيش عساكر ولا زحمة ولا ضرب ,, وكون ان كل حاجة طبيعية ده فى حد ذاته مش طبيعى... دخلت اول لجنة قابلتنى..
مييين؟؟ استاذ محمد؟؟
ازيك يا مصطفى؟؟
الحمد لله انت ايه اخبارك؟؟
كويسين. ايه انت جاى تنتخب؟؟
انا مش جاى انتخب لان دى مش انتخابات ومفيش حد مترشح.. انا جاى اصوت فى التعديلات الدستورية
وانت تبع مين بقى؟؟ -قالها وهو بيغمزلى بينى وبينه-
ياعم انا مش تبع حد انا تبع نفسى.. ما بلاش الكلام الكبير ده احنا متراقبين دلوقتى -فى الواقع كنت بهدده-
وبعد السلامات والتحيات واخبار الدنيا قاللى ان حرف الميم فى اللجنة اللى جنبنا, طب انا حروح اصوت بقى يا استاذ محمد. طيب
دخلت اللجنة متحفز.. مفيش قاضى فى اللجنة ليه مش عارف.. ثلاث موظفين شكلهم مالوف منهم واحد تقريبا مدرس بس مش فاكر اسمه.. دخلت على طول مكانش فى طوابير.. بعد ما دورت على اسمى فى ثوانى ومضيت,, ادانى الورقة وقلم وقالى روح ورا الستارة اللى هناك دى -كمان فى ستارة؟!!!- روحت ملقيتش الصندوق..
امال فين الصندوق؟؟ سالت بصوت عالى
هنا اهو
كان واحد من الثلاثة قاعد على الصندوق مش عارف هو الصندوق فيه ايه عاجبه كده.. المهم علمت على لا من غير ما اقرا اى حاجة.. مديت ايدى بالورقة.. قام الراجل اللى قاعد عليه وخدها وطبقها ..والكائن الغريب اللى قاعد فى النص قالى الحبر الفسفورى هناك جنب الشباك.. روحت .. حطيت صباعى.. ولفيت وخرجت.. ووانا خارج كان الراحل بيحط الورقة فى الصندوق
معقولة؟؟ بالبساطة دى؟؟ اكيد فى حاجة غلط.. طول ما انا ماشى فى حاجة بتزن فى دماغى.. معقول ممكن يكون غير الورقة بمجرد ما لفيت وحط ورقة تانية؟؟ ده انا يادوب ثانيتين ثلاثة, استحالة... واستحالة ليه؟؟ طب هى النتيجة بتطلع 99% ازاى؟؟
مش عارف ليه ساعتها افتكرت جلسة من جلسات مجلس الشعب كنت شوفتها زمان فى التلفزيون لما كانت بتيجى.. كان عضو مش عارفه من المعارضة عمال يتنطط ويزعق وبيتكلم كده وهو مندفع .. ولما خلص كلام قام كمال الشاذلى بكل هدوء وقال انا عارف ان العضو ميقصدش.. وده يتشال ويتهبد..لا انا اقصد كل كلمة..
يبتسم كمال الشاذلى فى سخرية ..لا انا عارف ان انت متقصدش
انت متقصدش
انت متقصدش
اكيد هما كمان عارفين ان انا مقصدش
Subscribe to:
Post Comments (Atom)
No comments:
Post a Comment