اتعلم من الحمار او اتعلم منى

واول تدوينة احب اكتبها, هى حكاية غريبة مفهمتهاش الا متاخر قوى... بس يمكن بتعبر عن راى ليا فى الحياة.. بتحكى ان جحا حب يعلم ابنه حكمة فى يوم من الايام فقاله تعالى معايا السوق... عارفين ايه اللى حصل؟؟ عادى خالص
وهما رايحيين كان جحا راكب الحمار وابنه ماشى جنبه,, فعدوا على جماعة من الناس فقالوا لبعض: شوفو الراجل اللى مفيش فى قلبه حبة رحمة صغننين؟؟ هو راكب وسايب ابنة الكتكوت ده ماشى على رجليه... وهو لسه صغير و مش وش بهدلة
قام جحا نزل وابنه ركب بداله على الحمار.. فعدوا برضو على جماعة من الناس فقالوا لبعضيهم: شوفوا الزمن اللى اتقلب حاله؟؟ العيل الصغير هو اللى راكب وابوه الكبير ماشى جنبه.. خلاص مبقاش فيه احترام ولا خشا
قام جحا ركب مع ابنه على الحمار.. خلاص اتحلت بقى؟؟؟ لا يا زكى هو حيروح فين من كلام الناس.. عدوا زى مانتوا عارفين على جماعة من الناس بس.. من بتوع خقوق الحيوان فقالوا لبعضيهم: شوفوا الناس اللى معندهاش رحمة؟؟ راكبين هما الاتنين على الحمار الضعفان ده؟؟ طب واحد يمشى وواحد يركب
جحا بقى جاب اخره... و شخط فى ابنه.. ونزلوا هما الاتنين يمشوا جنب الحمار وعدوا على ايه؟؟؟ شطار... جماعة من الناس, فقالوا لبعضيهم: الناس دى هبلة ولا ايه؟؟ ماشيين هما الاتنين جنب الحمار من غير ماحد يركب؟؟ امال ايه لزمة الحمار؟؟
قام جحا- ودى اكبر غلطة فى حياتة- شال الحمار هو وابنه, والناس اتلمت عليهم: شوفوا ولاد المجنونة اللى شايلين الحمار؟؟ خلاص الحمير هى اللى حتركب البنى ادمين؟؟
ياااااااااه
شوفتوا الناس وصلوا جحا لايه؟؟ مش جحا بس.. وانت كمان.. مش فاكر اخر مشكلة وقعت فيها؟؟ فاكر لما صاحبك قالك انت اللى غلطان... بس صاحبك التانى قالك انت مالكش ذنب.. وواحد تالت قالك انت ابن ستين فى سبعين.. لأ وايه؟؟ واحد رابع شايفك بطل قومى.. وانت فى النص محتار زى الحمار
فقدامك حل من اتنين مالهومش تالت
ياما تتعلم من الحمار وتبقى حمار بجد .. واحد يركبك, وماله.. اتنين, اصبر مانت شيال حمول.. وبعدين مانت حمار يا اخى و دى شغلتك.. والعجيب ان الناس حتشيلك على كتافها فى الاخر
او تتعلم منى وانا منصحكش.. اصل طالما كده كده مش حتعرف ترضى كل الناس يبقى خلاص.. اعمل اللى على مزاجك واللى مش عاجبه ميبصس.. وقول اللى فى نفسك واللى مش عاجبه يسد ودانه... بس صدقنى اخرتك وحشه ..... وانا معرفكش